(87) سورۃ الاعلٰی (مکی — کل آیات 19)

بِسْمِ اللّـٰهِ الرَّحْـمٰنِ الرَّحِيْـمِ

اپنے رب کے نام کی تسبیح کیا کر جو سب سے اعلٰی ہے۔

وہ جس نے پیدا کیا پھر ٹھیک بنایا۔

اور جس نے (ہر چیز کا) تخمینہ ٹھہرایا پھر راہ دکھائی۔

اور وہ جس نے چارہ نکالا۔

پھر اس کو خشک سیاہ چورا (کچرا) کر دیا۔

البتہ ہم آپ کو پڑھائیں گے پھر آپ نہ بھولیں گے۔

مگر جو اللہ چاہے، بے شک وہ ہر ظاہر اور چھپی بات کو جانتا ہے۔

اور ہم آپ کو آسان شریعت کے سمجھنے کی توفیق دیں گے۔

پس آپ نصیحت کیجیے اگر نصیحت فائدہ دے۔

جو اللہ سے ڈرتا ہے وہ جلدی سمجھ جائے گا۔

اور بڑا بد نصیب (ہے جو) اس سے الگ رہے گا۔

جو سخت آگ میں داخل ہوگا۔

پھر اس میں نہ تو مرے گا اور نہ جیے گا۔

بے شک وہ کامیاب ہوا جو پاک ہو گیا۔

اور اپنے رب کا نام یاد کیا پھر نماز پڑھی۔

بلکہ تم تو دنیا کی زندگی کو ترجیح دیتے ہو۔

حالانکہ آخرت بہتر اور زیادہ پائیدار ہے۔

بے شک یہی پہلے صحیفوں میں ہے۔

(یعنی) ابراھیم اور موسٰی کے صحیفوں میں۔